ஏலகிரிக்கு ஒரு சுற்றுலா பயணம் போகலாம் வரீங்களா?

ஏலகிரி சுற்றுலா ஒரு பார்வை 

சென்னையிலிருந்து அடிக்கடி பேருந்து வசதி இருக்கும் ஏலகிரிக்கு4 மணி நேரத்தில் ஏலகிரிக்கு சென்று விடலாம்.

ஏலகிரி மலையில் ஆண்டு முழுவதும் மிதமான குளிர்ச்சியுடன் கூடிய தட்ப வெப்பநிலை நிலவுகிறது. வேலூரில் இருந்து 96 கி.மீ. தொலைவில் உள்ளது. வேலூரில் இருந்து திருப்பத்தூர் மார்க்கமாக செல்லும் பஸ்களில் சென்று பொன்னேரியில் இறங்க வேண்டும். அங்கிருந்து இருந்து 14 வளைவு பாதைகளை கடந்தால் ஏலகிரி.

ஏலகிரிமலை 29.2 சதுர கி.மீ. பரப்பு கொண்டது. கடல் மட்டத்தில் இருந்து 1048.5 மீட்டர் உயரத்தில் இருக்கிறது. கோடைக்காலத்தில் 34 டிகிரியும், குளிர்காலத்தில் 11 டிகிரி வெப்பநிலையும் காணப்படுகிறது.

புங்கனூர் ஏரி படகு குழாம், குழந்தைகள் பூங்கா, முருகன் கோயில், அத்தனாவூர் மற்றும் நிலாவூரில் உள்ள அரசு பழத்தோட்டம்,அரசு மூலிகைப் பண்ணை, டெலஸ்கோப் கருவி, ஜலகாம்பாறை நீர்வீழ்ச்சி, மங்களம் ஏரி, மலை மீது அமைந்திருக்கும் நீண்ட நடைப்பாதை, நிலாவூர் தம்புரான் குளம், தேவ நாச்சியம்மன் கோயில், பரண் பார்வை மையம் போன்றவை இங்கு காண வேண்டிய இடங்கள். புங்கனூர் ஏரி, மலையின் நடுவில் 56.7 சதுர மீட்டர் பரப்பில் உள்ளது. இங்கு படகு சவாரி செய்யலாம். தமிழக அரசு வனத்துறை சார்பில் புங்கனூர் ஏரி அருகே மூலிகைப் பண்ணை அமைக்கப்பட்டுள்ளது. 

https://maps.app.goo.gl/gkz3JEgyWg339zqaA

இங்கு ஆயுர்வேதம் மற்றும் சித்த மருத்துவத்துக்கு பயன்படும் அரிய மூலிகைகள் பயிரிடப்படுகிறது. புங்கனூர் ஏரியை அடுத்து 6 ஏக்கர் பரப்பில் சிறுவர் பூங்கா அமைக்கப்பட்டுள்ளது.

ஏலகிரி நுழைவு வாயிலில் அமைக்கப்பட்டுள்ள டெலஸ்கோப் வழியாக மலையின் எழிலையும், மலைச்சரிவு மற்றும் பள்ளத்தாக்குகளையும் காண முடியும். தென்னிந்தியாவிலேயே ஏலகிரி மலையில்தான் பாராகிளைடிங் பயிற்சி அளிக்கப்படுகிறது. இது தவிர இசை நீரூற்று, மலர் பூங்கா என பல்வேறு பொழுதுபோக்கு அம்சங்களும் உள்ளன.

பஸ், தங்கும் வசதி

சென்னையில் இருந்து பெங்களூர் செல்லும் ரயிலில் ஜோலார்பேட்டையில் இறங்கி அங்கிருந்து ஏலகிரி செல்லலாம். பஸ் வசதியும் உள்ளது. மலையில் ரூ.300 முதல் ரூ.3 ஆயிரம் வரை வாடகையில் விடுதிகள் உள்ளன. அரசு சார்பில் யாத்திரை நிவாஸ் என்ற விடுதி உள்ளது. ஒரு நாளுக்கு ரூ.250 முதல் ரூ.700 வரை கட்டணம். ஏலகிரியில் 30க்கும் மேற்பட்ட அசைவ, சைவ ஓட்டல்கள் உள்ளன.

ஜலகாம்பாறை

வேலூரில் இருந்து 93 கி.மீ. தொலைவில், திருப்பத்தூரில் இருந்து 13 கி.மீ. தொலைவில் உள்ளது ஜலகாம்பாறை நீர்வீழ்ச்சி. அருகில் அமைந்துள்ள லிங்க வடிவிலான முருகன் கோயில் பிரசித்தமானது.

ஜவ்வாதுமலை

வேலூரில் இருந்து 110 கி.மீ. தொலைவில் உள்ளது. வேலூரில் இருந்து திருப்பத்தூர் சென்று அங்கிருந்து ஜவ்வாதுமலை செல்லலாம். சந்தனம், பலா, கடுக்காய் போன்ற அரிய வகை மரங்கள் அடர்ந்து காணப்படுகின்றன. மலையேற்ற பிரியர்களுக்கு ஏற்ற இடம்.